कसे सरतील सये...
कसे सरतील सये माझ्याविन दिस तुझे ?
सरताना आणि सांग सलतील ना !
गुलाबाची फुलं दोन रोज राती डोळ्यावर
मुसुमूसू पाणी सांग भरतील ना !...
पावसाच्या धारा धारा... मोजतना दिस सारा
रिते रिते मन तुझे उरे...
ओठ भर हसे हसे... उरातून वेडेपिसे
खोल खोल कोण आता झुरे ?
आता जरा अळीमीळी
तुझी माझी व्यथा निळी
सोसताना सुखावून हसशील ना !...
गुलाबाची फुलं दोन रोज राती डोळ्यावर
मुसुमूसू पाणी सांग भरतील ना !...
कोण तुझ्या सौधातून उभे असे सामसूम
चीडिचुप... सूनसान दिवा !
आता सांज ढळेलच आणि पुन्हा छळेलच
नभातून गोरा चांदवा !!
चांदण्याचे कोटीकण
आठवांचे ओले सण
रोज रोज नीजभर भरतील ना !...
गुलाबाची फुलं दोन रोज राती डोळ्यावर
मुसुमूसू पाणी सांग भरतील ना !...
इथे दूरदेशी माझ्या सुन्या खिडकीच्यापाशी
झडे सर... काचभर तडा !
तूच तूच... तुझ्या तुझ्या... तुझी तुझी
सारा सारा तुझा तुझा सडा !!
पडे माझ्या वाटेतून
आणि मग काट्यातून
जातानाही पायभर मखमल ना !...
गुलाबाची फुलं दोन रोज राती डोळ्यावर
मुसुमूसू पाणी सांग भरतील ना !...
आता नाही बोलायचे... जरा जरा जगायचे
माळुनिया अबोलीची फुले !
देहभर हलू देत... विजेवर झुलु देत
तुझ्या माझ्या विरहाचे झुले !!
जरा घन झुरु दे ना
वारा गुदमरु दे ना
तेव्हा नभ धरा सारी भिजवील ना !...
गुलाबाची फुलं दोन रोज राती डोळ्यावर
मुसुमूसू पाणी सांग भरतील ना !...भरतील ना !...
कसे सरतील सये माझ्याविन दिस तुझे ?
सरताना आणि सांग सलतील ना !
गुलाबाची फुलं दोन रोज राती डोळ्यावर
मुसुमूसू पाणी सांग भरतील ना !...
भरतील ना !...
भरतील ना !...
भरतील ना !...
No comments:
Post a Comment